மத்திய மாகாண வருவாய்த் திணைக்களத்தின் டிஜிட்டல் மயமாக்கல் திட்டம் உத்தியோகபூர்வமாக ஆரம்பித்து வைக்கப்பட்டது

மத்திய மாகாண வருவாய்த் திணைக்களத்தின் முத்திரைத் தீர்வை செலுத்தும் செயல்முறையை டிஜிட்டல் மயமாக்கும் நோக்கிலான திட்டம் 2026 நவம்பர் 02 ஆம் திகதி உத்தியோகபூர்வமாக ஆரம்பித்து வைக்கப்பட்டது. இந்நிகழ்வு மத்திய மாகாண கௌரவ ஆளுநர் விசேட வைத்திய நிபுணர் டொக்டர் சுரங்க பெர்னாண்டோ அவர்களின் தலைமையில் நடைபெற்றது.

இத்திட்டத்துடன் இணைந்ததாக, முத்திரைத் தீர்வை செலுத்துவதற்காக அறிமுகப்படுத்தப்பட்ட புதிய இணையவழி முத்திரைத் தீர்வை இணையவாசல் (Online Stamp Duty Portal) கௌரவ ஆளுநர் அவர்களால் பொதுமக்களின் பயன்பாட்டிற்காக உத்தியோகபூர்வமாகத் திறந்து வைக்கப்பட்டது. இந்நிகழ்வு மத்திய மாகாண ஆளுநர் அலுவலகத்தின் கேட்போர் கூடத்தில் நடைபெற்றது.

முத்திரைத் தீர்வை அறவிடும் செயல்முறையுடன் தொடர்புடைய முக்கிய பங்குதாரர்களான மாகாண வருவாய்த் திணைக்களம், நோத்தாரிசுகள், காணி பதிவாளர் அலுவலகங்கள் மற்றும் வங்கிகள் ஆகியவற்றுக்கிடையில் சிறந்த ஒருங்கிணைப்பை ஏற்படுத்துவதன் மூலம், முத்திரைத் தீர்வை செலுத்தும் செயல்முறையின் வினைத்திறன், வெளிப்படைத்தன்மை மற்றும் நம்பகத்தன்மையை மேம்படுத்துவதுடன், மோசடிகள் மற்றும் ஊழல்களைக் குறைப்பதும் இப்புதிய டிஜிட்டல் மயமாக்கல் திட்டத்தின் முக்கிய நோக்கங்களாகும்.

மேலும், காணி பதிவு செயன்முறையில் காணி பதிவாளர் அலுவலகங்கள் ஆற்றும் முக்கிய பங்கினைக் கருத்தில் கொண்டும், இத்திட்டத்தின் வினைத்திறனை அதிகரிக்கும் நோக்கிலும், குறித்த நிறுவனங்களுக்கு கணினிகள் அன்பளிப்பாக வழங்கும் நிகழ்வும் இதன்போது இடம்பெற்றது.

இந்நிகழ்வில் மத்திய மாகாண பிரதம செயலாளர் திரு. அஜித் பிரேமசிங்க, மத்திய மாகாண பிரதி பிரதம செயலாளர் (நிதி) திரு. மஞ்சுள ஏக்கநாயக்க, மத்திய மாகாண ஆளுநரின் உதவிச் செயலாளர் திரு. வருண மியனதெனிய, மத்திய மாகாண உதவி காணி ஆணையாளர் திருமதி. தரங்கா கவிராஜ், கண்டி, குண்டசாலை, கம்பளை, மாத்தளை மற்றும் நுவரெலியா ஆகிய பிரதேசங்களின் உதவி காணி ஆணையாளர்கள், மக்கள் வங்கி மற்றும் இலங்கை வங்கியைப் பிரதிநிதித்துவப்படுத்தும் அதிகாரிகள், சட்டத்தரணிகள் சங்கப் பிரதிநிதிகள், மத்திய மாகாண வருவாய்த் திணைக்கள ஆணையாளர் உள்ளிட்ட திணைக்கள அதிகாரிகள் பலரும் கலந்து கொண்டனர்.

இந்த டிஜிட்டல் மயமாக்கல் திட்டத்தின் மூலம் அரசாங்கத்தின் புதிய கொள்கைகளுக்கு இணங்க, மத்திய மாகாணத்தில் முத்திரைத் தீர்வை செலுத்தும் சேவையை மேலும் வினைத்திறன் மிக்கதாகவும், முறையானதாகவும், பொதுமக்கள் இலகுவாக அணுகக்கூடிய சேவையாகவும் மாற்றுவதற்கு எதிர்பார்க்கப்படுகிறது.

புகைப்படங்கள் நன்றி: Kandy Media Unit News, Media Unit – Central Province.

மேலதிக தகவல்களுக்கு